ಕೋಳಿಗಳ ರುಂಡ ತಿಂದು‌ ಹಾಕಿದ ಅನಾಮಧೇಯ ಪ್ರಾಣಿ: ಉಪಜೀವನ ನಡೆಸುತ್ತಿದ್ದ ಕುಟುಂಬಕ್ಕೆ ಆತಂಕ!

ಮುಂಡರಗಿ:ಕೋಳಿ ಗೂಡಿನಲ್ಲಿದ್ದ ಮೂವತ್ತಕ್ಕೂ ಹೆಚ್ಚು ಕೋಳಿಗಳ ರುಂಡವನ್ನ ಅನಾಮಧೇಯ ಪ್ರಾಣಿವೊಂದು ತಿಂದು‌ಹಾಕಿದ ಪರಿಣಾಮ ನಾಟಿ ಕೋಳಿಗಳು ಸಾವನ್ನಪ್ಪಿರೋ ಘಟನೆ ಗದಗ ಜಿಲ್ಲೆ ಮುಂಡರಗಿ ತಾಲೂಕಿನ ಗಂಗಾಪುರ ಗ್ರಾಮದಲ್ಲಿ ನಡೆದಿದೆ.

ಶಾರವ್ವ ನಿಂಗಪ್ಪ ಹರಿಜನ ಎಂಬುವರಿಗೆ ಸೇರಿದ ಕೋಳಿಗಳು ಇವಾಗಿವೆ. ಸುಮಾರು ವರ್ಷಗಳಿಂದ ಶಾರವ್ವ ತಮ್ಮ ಉಪಜೀವನಕ್ಕಾಗಿ ನಾಟಿ ಕೋಳಿ, ಟಗರು ಮತ್ತು ಕುರಿ ಮರಿಗಳ ಸಾಕಾಣಿಕೆಯನ್ನು ಉದ್ಯೋಗ ಮಾಡಿಕೊಂಡು ಜೀವನ ನಡೆಸ್ತಿದ್ರು.

ಇದೀಗ ಏಕಾಏಕಿ ನಾಟಿ ಕೋಳಿಗಳು ರುಂಡವಿಲ್ಲದೇ ಸತ್ತು ಬಿದ್ದಿರುವುದು ಅವರನ್ನು ಆತಂಕಕ್ಕೆ ಈಡು ಮಾಡಿದೆ. ಅನಾಮಧೇಯ ಪ್ರಾಣಿ ಕೋಳಿಗಳ ರುಂಡವನ್ನ ಬಲಿ‌ ಪಡೆದಿರಬಹುದು‌ ಎನ್ನಲಾಗಿದ್ದು, ಇವುಗಳನ್ನ ಸಾಕಿ ತನ್ನ ಉಪಜೀವನ ನಡೆಸುತ್ತಿದ್ದ ಶಾರವ್ವಳಿಗೆ ಆರ್ಥಿಕವಾಗಿ ತೊಂದರೆ ಉಂಟಾಗಿದೆ. ಕೂಡಲೇ ಅರಣ್ಯ ಇಲಾಖೆ ಕೋಳಿಗಳ ಸಾವಿಗೆ ಕಾರಣ ಏನೆಂಬುದನ್ನ ಪತ್ತೆ ಹಚ್ಚಬೇಕು ಹಾಗೂ ಸಂಬಂಧಪಟ್ಟ ಅಧಿಕಾರಿಗಳು ಶಾರವ್ವನಿಗೆ ಪರಿಹಾರ ಒದಗಿಸಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.