ಹೊನ್ನಾವರ: ಭಕ್ತರಿಗೂ, ಭಗವಂತನಿಗೂ ಅವಿನಾಭಾವ ಸಂಬಂಧವಿದೆ. ಭಕ್ತರಿಲ್ಲದೆ ಭಗವಂತನೆ ಇಲ್ಲ. ಭಗವಂತನ ಅಸ್ತಿತ್ವ ಇರುವುದೇ ಭಕ್ತರಲ್ಲಿ ಎಂದು ಶ್ರೀ ಕ್ಷೇತ್ರ ಬಂಗಾರಮಕ್ಕಿಯ ಶ್ರೀ ವೀರಾಂಜನೇಯ ದೇವಸ್ಥಾನದ ಧರ್ಮದರ್ಶಿಗಳಾದ ಪೂಜ್ಯ ಶ್ರೀ ಮಾರುತಿ ಗುರೂಜಿ ಹೇಳಿದರು.
ಅವರು ಹೊನ್ನಾವರ ತಾಲೂಕಿನ ಶ್ರೀ ವಿಶ್ವವೀರಾಂಜನೇಯ ಮಹಾಸಂಸ್ಥಾನಮ್ ಹೇಮಪುರ ಮಹಾಪೀಠ, ಶ್ರೀ ವೀರಾಂಜನೇಯ ಧಾರ್ಮಿಕ ಹಾಗೂ ದತ್ತಿ ಸಂಸ್ಥೆ ವತಿಯಿಂದ ಗೇರಸೊಪ್ಪದ, ಶ್ರೀ ಕ್ಷೇತ್ರ ಬಂಗಾರಮಕ್ಕಿಯಲ್ಲಿ ಸಂಸ್ಕೃತಿ ಕುಂಭ-ಮಲೆನಾಡು ಉತ್ಸವ ಹಾಗೂ ಪ್ರತಿಷ್ಠಾ ಮಹೋತ್ಸವ ಮತ್ತು ಜಾತ್ರಾ ಮಹೋತ್ಸವದ ಅಂಗವಾಗಿ ಶುಕ್ರವಾರ ನಡೆದ ಧರ್ಮಸಭೆಯ ಸಾನಿಧ್ಯ ವಹಿಸಿ ಮಾತನಾಡಿದರು.
ದೇವಸ್ಥಾನಗಳು ಒಂದು ಧರ್ಮ, ಒಂದು ಕೋಮು ಅಥವಾ ಮತಕ್ಕೆ ಸೀಮಿತ ಅಲ್ಲ, ದೇವರ ಆವಾಸ ಸ್ಥಾನವಾಗಿವೆ. ದೇವರು ಎಲ್ಲಡೆ, ಎಲ್ಲರಲ್ಲೂ ಇದ್ದು, ಅಣುರೇಣು ತೃಣಕಾಷ್ಟನಾಗಿದ್ದಾನೆ. ಸಮಾಜವನ್ನು ಉದ್ಧರಿಸುವ ಜವಾಬ್ದಾರಿಯುತ ಸ್ಥಾನ ದೇವಸ್ಥಾನದ ಮೇಲಿದೆ. ಸಮಾಜ ಹಾಗೂ ಸಮಾಜದಲ್ಲಿರುವ ವ್ಯಕ್ತಿಗಳು ದಾರಿ ತಪ್ಪಿದಾಗ ತಿದ್ದಿ ಹೇಳುವ ವ್ಯವಸ್ಥೆ ದೇವಸ್ಥಾನಗಳಲ್ಲಿರಬೇಕು.ದೇವಸ್ಥಾನಗಳು ಕೇವಲ ಪೂಜೆ ಪುನಸ್ಕಾರಕ್ಕೆ ಅಷ್ಟೆ ಸೀಮಿತವಲ್ಲ.ಎಲ್ಲ ಆಗುಹೋಗುಗಳಿಗೆ ಸ್ಪಂದಿಸಿ ಸನ್ಮಾರ್ಗದಲ್ಲಿ ಸಮಾಜವನ್ನು ಕೊಂಡೊಯ್ಯುವ ಕೆಲಸ ದೇವಸ್ಥಾನಗಳದ್ದು.ಎಲ್ಲರನ್ನು ಜೊತೆಗೂಡಿಸಿಕೊಂಡು ಹೋಗಲು ಉತ್ಸವಗಳು ಬೇಕು.ದೇವಸ್ಥಾನಗಳು ಸಮಾಜದಲ್ಲಿ ಸರಿಯಾಗಿ ಕಾರ್ಯನಿರ್ವಹಿಸದಿದ್ದಾಗ ಟೀಕೆ ಟಿಪ್ಪಣೆಗಳು ಸಹಜವಾಗಿ ಬರುತ್ತದೆ.
ಅಂತಹ ಟೀಕೆಗಳ ಬಗ್ಗೆಯೂ ದೇವಸ್ಥಾನಗಳು ಯೋಚಿಸಬೇಕು.ಆದರೆ ಭಕ್ತರು, ಭಕ್ತರ ಸೇವೆ ಇಲ್ಲದೆ ದೇವಸ್ಥಾನಗಳು ನಡೆಯಲು ಸಾಧ್ಯವಿಲ್ಲ ಎಂದರು.
ಗದಗಿನ ಪ್ರಾಚಾರ್ಯ ಪ್ರಾಚಾರ್ಯ ವಸಂತ ಅಗಸಿಮನಿ ಮಾತನಾಡಿ, ಧಾರ್ಮಿಕತೆ, ಭಾಷೆಗೆ ಶ್ರೀ ಕ್ಷೇತ್ರ ಬಂಗಾರಮಕ್ಕಿಯ ಕೊಡುಗೆ ಅಪಾರವಾಗಿದೆ. ಕಲೆ, ಸಂಸ್ಕೃತಿಗೆ ವಿಶೇಷ ಆದ್ಯತೆಯನ್ನು ಕ್ಷೇತ್ರ ನೀಡಿದೆ. ಮಾರುತಿ ಗುರೂಜಿ ಅವರ ದೂರದೃಷ್ಟಿ, ಸಾಮಾಜಿಕ ಕಾಳಜಿ ನಿಜಕ್ಕೂ ಮಾದರಿಯಾಗಿದೆ. ಕ್ಷೇತ್ರದ ಪ್ರಾಣದೇವರು ಬಂಗಾರಮಕ್ಕಿ ವೀರಾಂಜನೇಯನ ಕೀರ್ತಿ ದೇಶದಾದ್ಯಂತ ಹರಡಿದೆ. ಈ ಮೂಲಕ ಹೆಸರಿಗೆ ತಕ್ಕಂತೆ ಭಕ್ತರ ಪಾಲಿನ ಬಂಗಾರವೇ ಬಂಗಾರಮಕ್ಕಿಯಾಗಿದೆ ಎಂದರು.
ಪತ್ರಕರ್ತ ಮಂಜುನಾಥ ಹಳ್ಳೇರ, ಗ್ರಾಪಂ ಅಧ್ಯಕ್ಷೆ ಪುಷ್ಪಾ ನಾಯಕ ಮಾತನಾಡಿದರು. ನಗರಬಸ್ತಿ ಗ್ರಾಪಂ ಸದಸ್ಯೆ ಗಣತಿ ಹಳ್ಳರ ವೇದಿಕೆ ಮೇಲಿದ್ದರು.
ಮಂಜುನಾಥ ಸ್ವಾಗತಿಸಿ, ಗೋಪಾಲಕೃಷ್ಣ ಕುಮಟಾ ನಿರೂಪಿಸಿ, ವೈಶಾಲಿಗೌಡ ವಂದಿಸಿದರು.
