ಗದಗ, ಜೂನ್ 27:
ನಗರದ ಹೆಸರಾಂತ ಬಿಪಿನ್ ಚಿಕ್ಕಟ್ಟಿ ಬಿ.ಸಿ.ಎ. ಪದವಿ ಕಾಲೇಜಿನ ವಿದ್ಯಾರ್ಥಿಗಳು, ತಮ್ಮ ಪ್ರಪ್ರಥಮ ಸೆಮಿಸ್ಟರ್ ಪರೀಕ್ಷೆಯಲ್ಲಿ ಶ್ರೇಣಿದಾಯಕ ಸಾಧನೆಮಾಡಿ ಕಾಲೇಜಿನ ಹಾಗೂ ಪೋಷಕರ ಹೆಮ್ಮೆ ಹೆಚ್ಚಿಸಿದ್ದಾರೆ. ಈ ಪರೀಕ್ಷೆ ಕರ್ನಾಟಕ ವಿಶ್ವವಿದ್ಯಾಲಯ ಧಾರವಾಡದ ಮೂಲಕ ಕಳೆದ ತಿಂಗಳಲ್ಲಿ ನಡೆಸಲಾಗಿದ್ದು, ಫಲಿತಾಂಶ ಪ್ರಕಟವಾದ ನಂತರ ವಿದ್ಯಾರ್ಥಿಗಳ ಸಾಧನೆ ಸಂಸ್ಥೆಯ ಆಡಳಿತ ಮಂಡಳಿ ಹಾಗೂ ಬೋಧಕ ವೃಂದದಲ್ಲಿ ಹರ್ಷ ಉಂಟುಮಾಡಿದೆ.
ಸಂಸ್ಥೆಯ ಅಧ್ಯಕ್ಷರಾದ ಪ್ರೊ. ಎಸ್.ವೈ. ಚಿಕ್ಕಟ್ಟಿಯವರು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, “ಹೊಸದಾಗಿ ಆರಂಭಗೊಂಡ ಬಿ.ಸಿ.ಎ. ವಿಭಾಗದ ಈ ಮೊದಲ ಸೆಮಿಸ್ಟರ್‌ನಲ್ಲಿಯೇ ವಿದ್ಯಾರ್ಥಿಗಳು ತೋರಿದ ಶ್ರಮ ಹಾಗೂ ಶಿಸ್ತಿನ ಫಲವಾಗಿ, ಉತ್ತಮ ಫಲಿತಾಂಶ ಕಂಡುಬಂದಿದೆ. ಇಂತಹ ಶ್ರೇಣಿದಾಯಕ ಸಾಧನೆ ನಮ್ಮ ಸಂಸ್ಥೆಯ ಶೈಕ್ಷಣಿಕ ಮಟ್ಟವನ್ನು ಮತ್ತಷ್ಟು ಹೆಚ್ಚಿಸಿದ್ದು, ವಿದ್ಯಾರ್ಥಿಗಳ ಭವಿಷ್ಯಕ್ಕಾಗಿ ಇದು ಒಂದು ಶ್ರೇಷ್ಠ ಪಯಣದ ಪ್ರಾರಂಭವಾಗಿದೆ,” ಎಂದು ಹರ್ಷ ವ್ಯಕ್ತಪಡಿಸಿದರು.
ಅವರ ಜೊತೆ ಮಾತನಾಡಿದ ಪ್ರಾಚಾರ್ಯರಾದ ಶ್ರೀ ಬಿಪಿನ್ ಎಸ್. ಚಿಕ್ಕಟ್ಟಿಯವರು, ವಿದ್ಯಾರ್ಥಿಗಳ ಸಾಧನೆಯ ಹಿಂದೆ ಬೋಧಕ ವೃಂದದ ಮಾರ್ಗದರ್ಶನ, ತರಗತಿಯ ಒಳಗೆ ಹಾಗೂ ಹೊರಗಾದ ಶ್ರಮ ಹಾಗೂ ವಿದ್ಯಾರ್ಥಿಗಳ ಪದ್ದತಿಯುತ ಓದು ಪ್ರಮುಖ ಕಾರಣಗಳೆಂದು ಬಣ್ಣಿಸಿದರು. ಅಲ್ಲದೇ, ಅವರು ಮುಂದಿನ ದಿನಗಳಲ್ಲಿ ಇನ್ನು ಹೆಚ್ಚಿನ ಅಂಕಗಳೊಂದಿಗೆ ಬಿ.ಸಿ.ಎ. ಪದವಿಯನ್ನು ಪೂರ್ಣಗೊಳಿಸಲಿ ಎಂದು ಶುಭಹಾರೈಸಿದರು.
ಅಂಕಿಅಂಶದ ಪ್ರಕಾರ ಪ್ರಶಂಸನೀಯ ಸಾಧನೆ ಮಾಡಿದ ವಿದ್ಯಾರ್ಥಿಗಳು ಹೀಗಿದ್ದಾರೆ:
ಪ್ರಥಮ ಸ್ಥಾನ: ಕುಮಾರ ಶಿವಯೋಗಿ ಪಾಟೀಲ, CGPA – 8.63
ದ್ವಿತೀಯ ಸ್ಥಾನ: ಕುಮಾರ ಪುಟ್ಟರಾಜ ಕುರ್ತಕೋಟಿ, CGPA – 8.60
ತೃತೀಯ ಸ್ಥಾನ: ಕುಮಾರಿ ವಂದನಾ ಕೊರ್ಲಹಳ್ಳಿ, CGPA – 8.25
ಕುಮಾರಿ ಸಂಜನಾ ಐ. ಹಡಪದ, CGPA – 8.13
ಕುಮಾರಿ ಸಂಧ್ಯಾ ಆರ್. ಬೂಪಾಲಿ, CGPA – 8.00
ಕುಮಾರ ವಿಕಾಸ ಎಸ್. ಗುಂಜಾಳ, CGPA – 8.00
ಈ ಸಾಧನೆಯ ಹಿನ್ನೆಲೆಯಲ್ಲಿ ಕಾಲೇಜಿನ ಎಲ್ಲಾ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿ ಸದಸ್ಯರು ವಿದ್ಯಾರ್ಥಿಗಳಿಗೆ ಹಾರ್ದಿಕ ಅಭಿನಂದನೆ ಸಲ್ಲಿಸಿದ್ದಾರೆ.
