ಒಂದೇ ವರ್ಷದಲ್ಲಿ 1,331 ಮೆಗಾವ್ಯಾಟ್ ವಾಯುಶಕ್ತಿ ಉತ್ಪಾದನೆ ಸಾಮರ್ಥ್ಯ ಹೆಚ್ಚಳ – ತಮಿಳುನಾಡು, ಗುಜರಾತ್‌ ಅನ್ನು ಹಿಂದಿಕ್ಕಿದ ಕರ್ನಾಟಕ
ಬೆಂಗಳೂರು, ಜೂನ್ 16 – ವಾಯು ವಿದ್ಯುತ್ ಉತ್ಪಾದನೆಯಲ್ಲಿ ಮಹತ್ವದ ಸಾಧನೆ ಮಾಡಿದ ಕರ್ನಾಟಕ ರಾಜ್ಯಕ್ಕೆ ಕೇಂದ್ರ ಸರ್ಕಾರದಿಂದ ರಾಷ್ಟ್ರಮಟ್ಟದ ಪ್ರಶಸ್ತಿ ಲಭಿಸಿದೆ. ಕಳೆದ 2024-25ನೇ ಹಣಕಾಸು ವರ್ಷದಲ್ಲಿ ಕರ್ನಾಟಕವು 1,331.48 ಮೆಗಾವ್ಯಾಟ್ (ಮೆ.ವ್ಯಾ.) ವಾಯುಶಕ್ತಿ ಉತ್ಪಾದನಾ ಸಾಮರ್ಥ್ಯವನ್ನು ಹೆಚ್ಚಿಸಿಕೊಂಡಿದೆ. ಈ ಸಾಧನೆಯಿಂದ ಕರ್ನಾಟಕ, ತಮಿಳುನಾಡು (1,136.37 ಮೆ.ವ್ಯಾ.) ಮತ್ತು ಗುಜರಾತ್‌ (954.76 ಮೆ.ವ್ಯಾ.) ರಾಜ್ಯಗಳನ್ನು ಹಿಂದಿಕ್ಕಿ ದೇಶದ ಮೊದಲ ಸ್ಥಾನಕ್ಕೇರಿದೆ.
ಈ ಸಾಧನೆಯನ್ನು ಗೌರವಿಸಿ ಬೆಂಗಳೂರಿನಲ್ಲಿ ನಿನ್ನೆ (ಭಾನುವಾರ) ಜರುಗಿದ ಜಾಗತಿಕ ವಾಯು ದಿನಾಚರಣೆಯ ವೇಳೆ ಕೇಂದ್ರ ನವೀಕರಣ ಇಂಧನ ಸಚಿವ ಪ್ರಲ್ಹಾದ್ ಜೋಷಿ ಅವರು ರಾಜ್ಯದ ಇಂಧನ ಸಚಿವ ಕೆ.ಜೆ. ಜಾರ್ಜ್ ಅವರಿಗೆ ವಿಶೇಷ ಪ್ರಶಸ್ತಿ ನೀಡಿ ಸನ್ಮಾನಿಸಿದರು.
ಒಟ್ಟು ಸಾಮರ್ಥ್ಯ 7,351 ಮೆಗಾವ್ಯಾಟ್‌ಕ್ಕೆ ಏರಿಕೆ
ಈವರೆಗೆ ರಾಜ್ಯದಲ್ಲಿ ಸ್ಥಾಪಿತವಿರುವ ಒಟ್ಟು ವಾಯು ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವು 7,351 ಮೆಗಾವ್ಯಾಟ್‌ಗೆ (ಅಂದರೆ 7.35 ಗಿಗಾವ್ಯಾಟ್) ಏರಿಕೆಯಾಗಿದೆ. ಇದೊಂದು ಸಾಂದರ್ಭಿಕ ದಾಖಲೆ ಎಂದೇ ಗುರುತಿಸಲಾಗಿದೆ.
ರಾಜ್ಯ ಸರ್ಕಾರ ಈಗಾಗಲೇ ವಿವಿಧ ವಿಂಡ್ ಎನರ್ಜಿ ಯೋಜನೆಗಳನ್ನು ಹಮ್ಮಿಕೊಂಡಿದ್ದು, ಹೊಸ ಸಬ್ಸ್ಟೇಷನ್‌ಗಳು, ಪವರ್ ಕಾರಿಡಾರ್‌ಗಳು ಹಾಗೂ ನವೀಕರಣ ವಿದ್ಯುತ್ ಮೀಸಲು ವಲಯಗಳ ಹೂಡಿಕೆಗಳ ಮೂಲಕ ಮೂಲಸೌಕರ್ಯವನ್ನು ಬಲಪಡಿಸುತ್ತಿದೆ. ಮುಂದಿನ ಹಂತಗಳಲ್ಲಿ 17 ಗಿಗಾವ್ಯಾಟ್ ವಾಯುಶಕ್ತಿ ಉತ್ಪಾದನೆಯ ಸಾಮರ್ಥ್ಯ ಹೊಂದಲು ಯೋಜನೆ ರೂಪಿಸಲಾಗಿದೆ. ಇದರಿಂದ ರಾಜ್ಯದ ಒಟ್ಟು ಸಾಮರ್ಥ್ಯವನ್ನು 25 ಗಿಗಾವ್ಯಾಟ್‌ಗೆ ತಲುಪಿಸಲು ಪ್ರಯತ್ನ ನಡೆಯುತ್ತಿದೆ.
ಭಾರತಕ್ಕೆ 2030ರ ಗುರಿ – 100 ಗಿಗಾವ್ಯಾಟ್ ವಾಯುಶಕ್ತಿ
ಕೇಂದ್ರ ಸರ್ಕಾರ 2030ರೊಳಗೆ 500 ಗಿಗಾವ್ಯಾಟ್ ನವೀಕರಿಸಬಹುದಾದ ಇಂಧನ ಉತ್ಪಾದನೆಯ ಗುರಿ ಇಟ್ಟಿದ್ದು, ಇದರಲ್ಲಿ 100 ಗಿಗಾವ್ಯಾಟ್ ವಾಯು ವಿದ್ಯುತ್ ಭಾಗವಾಗಿದೆ. ಈ ಗುರಿ ತಲುಪುವಲ್ಲಿ ಕರ್ನಾಟಕ ರಾಜ್ಯದ ಪಾತ್ರ ಪ್ರಮುಖವಾಗಲಿದೆ ಎನ್ನುವುದು ನಿರೀಕ್ಷೆ.
ವಾಯುಶಕ್ತಿ ಕ್ಷೇತ್ರದಲ್ಲಿ ಕರ್ನಾಟಕದ ಈ ಮುನ್ನಡೆ, ಪರಿಸರ ಸ್ನೇಹಿ ಇಂಧನ ದಿಕ್ಕಿನಲ್ಲಿ ದೇಶದ ಪ್ರಗತಿಗೆ ಉತ್ತೇಜನ ನೀಡುತ್ತಿದೆ.
