ಗದಗ: ನಗರದ ಚಿಕ್ಕಟ್ಟಿ ಸಮೂಹ ಶಿಕ್ಷಣ ಸಂಸ್ಥೆಯ ಬಿಪಿನ್ ಚಿಕ್ಕಟ್ಟಿ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ವಿಶೇಷ ಕಾರ್ಯಕ್ರಮದ ಅಂಗವಾಗಿ ವಿದ್ಯಾರ್ಥಿಗಳು ಬಣ್ಣಬಣ್ಣದ, ಚಿತ್ತಾರದ ಗಾಳಿಪಟಗಳನ್ನು ಬಾನೆತ್ತರಕ್ಕೆ ಹಾರಿಸಿ ವಿಜ್ಞಾನ ಮತ್ತು ಆಟದ ಸಂಯೋಜನೆಯ ಮೂಲಕ ಜ್ಞಾನ ಹಾಗೂ ಉಲ್ಲಾಸವನ್ನು ವಿನಿಮಯ ಮಾಡಿಕೊಂಡರು.
ಈ ಸಂದರ್ಭದಲ್ಲಿ ಗಾಳಿಪಟದ ಇತಿಹಾಸ ಮತ್ತು ವೈಜ್ಞಾನಿಕ ಹಿನ್ನೆಲೆಯನ್ನ ಮಕ್ಕಳಿಗೆ ತಿಳಿಸಿಕೊಡಲಾಯಿತು. ಈ ಕಾರ್ಯಕ್ರಮದಲ್ಲಿ ಕನ್ನಡ ಉಪನ್ಯಾಸಕರಾದ ಶ್ರೀಶೈಲ ಬಡಿಗೇರ ಮಾತನಾಡುತ್ತಾ, “ರೈಟ್ ಸಹೋದರರು—ವಿಮಾನ ಸಂಶೋಧನೆಯಲ್ಲಿ ಅಮೋಘ ಕೊಡುಗೆ ನೀಡಿದ ವಿಜ್ಞಾನಿಗಳು—ತಮ್ಮ ಬಾಲ್ಯದಲ್ಲಿ ಗಾಳಿಪಟ ಹಾರಿಸುವುದು ಹಾಗೂ ಅದರ ಮೇಲೆ ಪ್ರಗಾಧ ಆಸಕ್ತಿ ಹೊಂದಿದ್ದರು. ಅವರೇ ಹೇಳುವ ಪ್ರಕಾರ, ಬಾಕ್ಸ್ ಗಾಳಿಪಟಗಳನ್ನು ಹಾರಿಸುತ್ತಿದ್ದಾಗ ಗಾಳಿಪಟಗಳು ವ್ಯಕ್ತಿಯನ್ನು ಮೇಲಕ್ಕೆತ್ತಲು ಸಾಕಷ್ಟು ಲಿಫ್ಟ್ ನೀಡುತ್ತವೆ ಎಂಬ ಕುರಿತು ಅವರು ಮಹತ್ವದ ಆವಲೋಕನ ಮಾಡಿದರು,” ಎಂದು ತಿಳಿಸಿದರು.
ಹೆಚ್ಚುವರಿಯಾಗಿ, ೧೮೯೯ರ ಆಗಸ್ಟ್ ತಿಂಗಳಲ್ಲಿ ರೈಟ್ ಸಹೋದರರು ನಿರ್ಮಿಸಿದ ಬೈಪ್ಲೇನ್ ಗಾಳಿಪಟ ಮತ್ತು ಅದರ ಮೂಲಕ ಕಂಡುಹಿಡಿದ ‘ರೆಕ್ಕೆ ವಾರ್ಪಿಂಗ್’ತಂತ್ರಜ್ಞಾನವನ್ನು ಅವರು ವಿವರಣೆ ಮಾಡಿದರು. ಈ ತಂತ್ರಜ್ಞಾನವು ಹಕ್ಕಿಗಳ ರೆಕ್ಕೆ ತಿರುಗುವಿಕೆಯನ್ನು ಅನುಕರಿಸುವ ಮೂಲಕ ವಿಮಾನಗಳ ನಿರ್ವಹಣೆಗೆ ಬುನಾದಿಯಾದ ಪ್ರಥಮ ಕಡ್ಡಾಯ ಸಂಶೋಧನೆಗಳಲ್ಲಿ ಒಂದಾಗಿದೆ ಎಂಬುದನ್ನು ಅವರು ಸ್ಪಷ್ಟಪಡಿಸಿದರು. ಈ ಎಲ್ಲ ವಿಚಾರಗಳು ವಿದ್ಯಾರ್ಥಿಗಳಲ್ಲಿಯ ವಿಜ್ಞಾನ ತತ್ತ್ವಗಳ ಬಗೆಗಿನ ಕುತೂಹಲವನ್ನು ಹೆಚ್ಚಿಸುವಲ್ಲಿ ಯಶಸ್ವಿಯಾದವು.
ಈ ವೈಜ್ಞಾನಿಕ ಜ್ಞಾನವನ್ನು ಆಧಾರವಾಗಿಟ್ಟುಕೊಂಡು ನೂರಾರು ವಿದ್ಯಾರ್ಥಿಗಳು ವಿವಿಧ ವಿನ್ಯಾಸದ ಗಾಳಿಪಟಗಳನ್ನು ತಯಾರಿಸಿ ಮುಕ್ತಾಕಾಶದಲ್ಲಿ ಹಾರಿಸಿ ಆನಂದಿಸಿದರು. ಮಕ್ಕಳು ನಗುಮೊಗದೊಂದಿಗೆ ಆಕಾಶದಲ್ಲಿ ಗಾಳಿಪಟಗಳ ನೃತ್ಯವನ್ನು ನೋಡುವಲ್ಲಿ ತಲ್ಲೀನರಾಗಿದ್ದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಪ್ರೊ. ಎಸ್. ವಾಯ್. ಚಿಕ್ಕಟ್ಟಿಯವರು ವಹಿಸಿದ್ದರು. ಉಪಪ್ರಾಚಾರ್ಯರಾದ ಶ್ರೀಮತಿ ಶೋಭಾ ಸ್ಥಾವರಮಠ, ಮುಖ್ಯೋಪಾಧ್ಯಾಯನಿಯರಾದ ಶ್ರೀಮತಿ ರಿಯಾನಾ ಮುಲ್ಲಾ, ಆಂಗ್ಲ ಭಾಷಾ ಶಿಕ್ಷಕಿಯರಾದ ಶ್ರೀಮತಿ ರಿಜಿನಾ ಎನ್., ಇತರೆ ಶಿಕ್ಷಕರು ಮತ್ತು ಪಾಲಕರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ವಿಜ್ಞಾನಾಧಾರಿತ ಶಿಕ್ಷಣವನ್ನು ಆಟದ ಮೂಲಕ ಮಕ್ಕಳಿಗೆ ತಲುಪಿಸುವ ಪ್ರಯತ್ನವಾಗಿ ಈ ಕಾರ್ಯಕ್ರಮ ಗುರುತಿಸಲ್ಪಟ್ಟಿತು. ಸಮಗ್ರ ಶಿಕ್ಷಣದ ದೃಷ್ಟಿಯಿಂದ ಇಂತಹ ಕಾರ್ಯಕ್ರಮಗಳು ಶಾಲಾ ಮಟ್ಟದಲ್ಲೇ ಮಕ್ಕಳ ಭಾವಿತವ್ಯವನ್ನು ರೂಪಿಸುವಲ್ಲಿ ಪರಿಣಾಮಕಾರಿ ಪಾತ್ರವಹಿಸುತ್ತವೆ ಎಂಬ ಅಭಿಪ್ರಾಯವನ್ನು ಶಿಕ್ಷಕರು ವ್ಯಕ್ತಪಡಿಸಿದರು.
